பிரிட்டனில் நடைபெறும் பார்முலா -2 கார் பந்தயத்தில் நடிகர் அஜீத்

சென்னை,​​ மார்ச் 25:​ பிரிட்டனில் இந்த ஆண்டு நடைபெறும் பார்முலா -2 கார் பந்தயத்தில் நடிகர் அஜீத் குமார் கலந்து கொள்கிறார்.

அஜீத் தவிர இந்தியாவில் இருந்து இப்ராஹிம்,​​ பார்தீவ் சுரேஷ்வரன் ஆகியோர் இந்த கார் பந்தயத்தில் பங்கேற்கின்றனர்.

பிரிட்டனின் சில்வர்ஸ்டோனில் உள்ள கார் பந்தய மைதானத்தில் ஏப்ரல் 16-ம் தேதி பார்முலா 2 போட்டிகள் நடைபெறவுள்ளன.​

இது குறித்து அவர் கூறியுள்ளது:​

பார்முலா 2 பந்தயத்தில் கலந்து கொள்ளும் நாளை மிகவும் ஆர்வத்துடன் எதிர்பார்த்து காத்திருக்கிறேன்.​ இந்த போட்டியில் சாதிக்க வேண்டும் என்ற எண்ணத்துடன்தான் களம் இறங்குகிறேன்.​ இதற்காக சமீபத்தில் மலேசியா சென்று பயிற்சி மேற்கொண்டேன்.​ இனி பிரிட்டன் சென்று போட்டி நடைபெறும் சில்வர்ஸ்டோனிலும் பயிற்சி மேற்கொள்ள இருக்கிறேன் என்று அஜீத் கூறியுள்ளார்.

முன்னதாக கடந்த 2003-ல் அஜீத் குமார் முதல்முறையாக சர்வதேச கார் பந்தயத்தில் பங்கேற்றார்.​ அப்போது பி.எம்.டபிள்யூ.​ ஆசிய சாம்பியன்ஷிப் கார் பந்தயத்தில் அவர் கலந்து கொண்டார்.

கடைசியாக பிப்ரவரியில் சென்னையில் நடைபெற்ற எம்.ஆர்.எஃப்.​ கார்பந்தயத்தில் அவர் இறுதிச் சுற்று வரை முன்னேறினார்.​ ஆனால் காரில் ஏற்பட்ட பழுது காரணமாக பந்தய தூரத்தை அவரால் ஏட்ட முடியவில்லை.​ அஜீத் குமார் வரும் மே 1-ம் தேதி 40 வயதை எட்டுகிறார்.​ அவருடன் கார் பந்தயத்தில் கலந்து கொள்ளும் இரு இந்திய வீரர்களும் இளைஞர்கள்.​ இதில் இப்ராஹிமுக்கு 21 வயதுதான் ஆகிறது என்பது குறிப்பிடத்தக்கது.